Indi kosmosda ýangyç guýmak mesele däl: Spaceium bu ugurda üstünlikli synag geçirdi

Emeli hemralara ýangyç guýmak we olary abatlamak üçin orbital beketleriň ulgamyny işläp düzýän Spaceium startapy özüniň esasy tehnologiýasyny üstünlikli synagdan geçirdi.
Geçen ýylyň noýabr aýynda kompaniýa SpaceX Transporter-15 missiýasynyň düzüminde robotlaşdyrylan hereketlendiriji mehanizmi älem giňişligine çykarypdy. Geçirilen synaglaryň netijeleri boýunça, onuň işe ukyplylygy we kosmosda hemralara hyzmat etmek üçin zerur bolan ýokary derejedäki ýerleşiş takyklygy tassyklanyldy.
Spaceium bu synagyň temperaturanyň tiz üýtgemeleri we radiasiýanyň ýokary derejesi ýaly hakyky kosmos şertlerinde doly derejeli barlag bolandygyny belleýär. Hereketlendiriji mehanizm 0,003° çenli aýlanma takyklygyny görkezdi. Bu bolsa manipulýator bilen bilelikde robotyň eliniň ujunyň 1 mm-den hem az derejede gyşarmagyna mümkinçilik berýär.
Ýerine ýetiriji mehanizmler hereketleriň ugruny we durnuklylygyny dolandyrýar. Ol hem öz gezeginde sepleşmekden başlap, hemralara ýangyç guýmaga çenli çylşyrymly amallar üçin mümkinçilikleri açýar. Häzirlikçe bu diňe orbital hyzmat ediş infrastrukturasynyň ösüş basgançagy bolsa-da, tehnologiýa kosmosda öz netijeliligini eýýäm subut etdi.