Hytaý 1-nji maýdan başlap, Afrikanyň diplomatik gatnaşyklary ýola goýlan 53 ýurdundan gelýän harytlar üçin gümrük pajyny ýatyrar. Bu barada Hytaý Halk Respublikasynyň başlygy Si Szinpin mälim etdi.
TASS-yň maglumatyna görä, Hytaýyň lideri bu barada Aý senenamasy boýunça golaýlap gelýän täze «Gyzyl at ýyly» mynasybetli Afrika bileleşiginiň başlygy Žoau Lourensuwa we Afrika bileleşiginiň komissiýasynyň ýolbaşçysy Mahamud Ali Ýusufa ugradan gutlag telegrammasynda mälim etdi.
Resminamada Hytaý bazaryna iberilýän Afrika önümleriniň gümrük pajyny nola düşürmek baradaky karar barada aýdylýar. Si Szinpin şeýle hem Afrikadan gelýän harytlar üçin «ýaşyl geçelgäniň» işini kämilleşdirmek meýilleri barada-da nygtady.
Şeýle-de TASS-yň habarynda «Hytaýyň bu täze çäreleri... Afrikanyň ösmegi we Hytaý-Afrika modernizasiýa arzuwynyň amala aşyrylmagy üçin täze mümkinçilikleri döreder» — diýip, HHR-iň ýolbaşçysynyň sözleri getirilýär.
HHR-iň Baş gümrük müdiriýetiniň maglumatyna görä, Hytaýyň Afrika ýurtlary bilen haryt dolanyşygy 2025-nji ýylda 17,7% ösüp, 348,05 milliard dollara ýetdi. Eksport 25,8% ösüp, 225,03 milliard dollara, import bolsa 5,4% ösüp, 123,02 milliard dollara ýetdi.
Hytaý Afrikanyň 53 ýurdundan gelýän harytlar üçin gümrük pajyny ýatyrar
- şu gün 15:23
- 3.2k+
