Londonyň "Tottenhem" futbol kluby horwatiýaly hünärmen Igor Tudoryň baş tälimçi wezipesine bellenilendigini resmi taýdan yglan etdi. Bu baradaky habar "şporalaryň" resmi sahypasynda çap edildi.
47 ýaşly hünärmen topary şu möwsümiň ahyryna çenli türgenleşdirer.
"Igor bize anyk maksat bilen goşulýar: netijeleri gowulandyrmak, üstünlik gazanmak we Premýer-liganyň ýaryş jedwelinde ýokary galmak. Onuň wezipesi ýönekeý — möwsümiň iň möhüm tapgyrynda toparda tertip-düzgüni, oýun depginini we bäsdeşlik ukybyny ýokarlandyrmak" diýlip, klubuň beýanatynda Tudoryň öňünde goýlan esasy wezipeler kesgitlenildi.
Igor Tudor "Tottenheme" gelmezden öň Ýewropanyň birnäçe öňdebaryjy klublarynda, şol sanda "Ýuwentus", "Lasio", "Marsel" we "Werona" ýaly toparlarda tejribe toplady. Onuň iş usuly durnukly goranmak we agressiw hüjüm taktikasy bilen tanalýar.
Täze tälimçi topary örän çylşyrymly ýagdaýda kabul edip aldy. Iňlis Premýer-ligasynyň 26 tapgyryndan soň, "Tottenhem" bary-ýogy 29 utuk toplap, 16-njy orunda barýar. Tudoryň gelmegi toparyň "howply zolagyndan" daşlaşmagy we möwsümi has ýokary basgançaklarda tamamlamagy üçin soňky mümkinçilik hasaplanýar.
