Ýaponiýanyň Tom’s Racing týuning (awtobezeg) studiýasy Toyota Century lýuks sedanyny döwrebaplaşdyryp, oňa has sport we agras görnüş berdi. Bu täzelik adaty durnuklylygy we asudalygy aňladýan Century modeliniň imijini düýpli üýtgedýär.
Atelýeniň hünärmenleri ulagyň aerodinamikasyny we daşky görnüşini täze öň we yzky bamperler, özboluşly gapdal "etekleri", bagažyň gapagynda ýerleşdirilen ykjam we owadan spoýler ýaly elementler bilen baýlaşdyrdylar.
Yzky tarapda dört sany hromlanan turbaly täze gazçykar ulgamy gurnaldy.
Ulagyň salony kaşaňlygyň iň ýokary derejesini saklap galýar: Salon gara ýa-da ak reňkli ýokary hilli Nappa derisinden we ýumşak Alkantaradan işlenildi. Oturgyç örtükleri, tirsekgoýarlar we gapy panelleri täzelendi. Kellegoýarlarda bolsa Tom’s brendiniň ýörite nagyşlary peýda boldy.
Century-nyň nyşany bolan gymmat bahaly agaç bezegleri üýtgewsiz galdyryldy.
Tom’s Racing her bir awtoulaga aýratyn çemeleşýär. Işe başlamazdan öň ulagyň korpusy we tehniki ýagdaýy düýpli barlanýar. Köne ýa-da zeper ýeten bölekler arassalanýar ýa-da täzesi bilen çalşyrylýar. Işler tamamlanandan soň, awtoulaglar resmi dilerler tarapyndan barlanýar. Bu bolsa ulagyň zawod kepilligini saklap galmaga mümkinçilik berýär.
Ulagyň "ýüregi" we sürüş aýratynlyklary üýtgewsiz galdy: Hereketlendiriji: 5,0 litrlik V8 (Hybrid). Kuwwaty: 431 at güýji we 510 Nm aýlaw pursaty. Rahatlygy üpjün edýän adaptiw howa asma ulgamy. Toyota Century Tom's Edition-yň bahasy 194 000 dollardan başlaýar. Eger alyjyda eýýäm Century bar bolsa, diňe týuning toplumyny 61 500 dollara sargyt edip biler.
Toyota ýakynda Century adyny Lexus-dan hem ýokarda durýan aýratyn bir "ultra-lýuks" brende öwürmek meýilnamasyny yglan edipdi.
