14-nji fewralda «garaşylmadyk myhman»: Ýylyň iň uly asteroidi Ýeriň golaýyndan uçup geçer

Aşyk-magşuklaryň gününde, has dogrusy, 14-nji fewralda Ýeriň golaýyndan ýylyň iň uly asteroidi bolan 162882 (2001 FD58) geçip gider. Russiýanyň Ylymlar akademiýasynyň Kosmos gözlegleri institutynyň Gün astronomiýasy barlaghanasynyň habar bermegine görä, onuň ölçegi 0,5 kilometrden 1 kilometre çenli diýlip çak edilýär.
Asteroid biziň planetamyzdan birnäçe million kilometr uzaklykdan uçup geçer. Astronomlar üçin radiusy 7,5 million kilometr bolan bu zolak «ähtimal howply» hasaplansa-da, alymlar hakyky howpuň ýokdugyny belleýär: Ýer bilen çaknyşma ähtimallygy nola deňdir.
Institutyň alymlarynyň bellemegine görä, nazary taýdan Ýer bilen çaknyşyp biljek golaýdaky uly obýekt — bu ölçegi 1 kilometr töweregi bolan 2017 SH33 asteroididir. Ýewropanyň kosmos agentliginiň maglumatlaryna görä, onuň 2026-njy ýylyň 30-njy aprelinde planetanyň üstüne gaçmak ähtimallygy, takmynan, 150 milliondan 1-e deň.
Şu ýyl çaknyşma ähtimallygy iň ýokary bolan asman jisimi — 10 metrlik 2013 TP4 asteroidi hasaplanýar. Onuň Ýere gaçmagy 1-nji oktýabrda bolup biler, ýöne ähtimallyk örän pes (takmynan 45 müňden 1-e deň). Şol senä golaýlaşdygyça, bu görkezijiniň has-da peselmegine garaşylýar.
Alymlaryň goşmaça bellemegine görä, 2026-njy ýylda Ýer üçin esasy howp Gün ulgamynyň iň alys çäklerinden ilkinji gezek ýüze çykarylan garaşylmadyk jisimler bolup biler.