TikTok, Instagram we Facebook ýetginjekler üçin howpsuzlyk synaglaryndan geçmäge razy boldylar

Häzirkizaman iň iri sosial ulgamlary bolan TikTok, Instagram, Facebook we Snapchat öz platformalarynyň ýetginjekleriň ruhy saglygy üçin näderejede howpsuzdygyny anyklajak garaşsyz barlaglardan meýletin geçmäge razy boldylar. The Washington Post neşiriniň habar bermegine görä, geljekde beýleki platformalaryň hem bu synaglara goşulmagyna garaşylýar.
Barlag düzgüni hukuk goraýjylar tarapyndan taýýarlanyldy.
Ýeterlik bal toplan platformalara howpsuzlygyň tassyknamasy hökmünde gök galkan görnüşli nyşan berler. Synagdan geçip bilmedik hyzmatlar bolsa, zyýanly kontenti netijeli çäklendirip bilmeýän platformalar hökmünde bellige alnar.
Hünärmenler sosial ulgamlarynda tükeniksiz tazelikler akymynyň görkezilmegine goýlan çäklendirmeleri, meýletin ýa-da mejbury arakesme funksiýalary, algoritmleriň, moderasiýanyň we mahabatyň aýdyňlygyny barlaýarlar.
Hukuk goraýjylar bu başlangyjyň tehnologik kompaniýalary üýtgetjekdigine we olaryň öz gurallaryny işläp düzmek hem-de ornaşdyrmak usullaryna hakykatdan hem täsir etjekdigine umyt edýärler. Taslamany dizaýner we telekeçi Kennet Koul tarapyndan esaslandyrylan «Ruhy saglyk meseleleri boýunça koalisiýa» goldaýar.
5-nji fewralda Bütindünýä Saglygy Goraýyş Guramasynyň (BSGG) başlygy Tedros Adanom Gebreýesus hem sosial torlarda ýaş çäklendirmelerini girizmäge çagyrypdy. Ol çagalar üçin ýüze çykýan zyýanyň diňe bir onlaýn geçirilen wagt bilen däl, eýsem platformalaryň «zyýanly we endik etdiriji gurluşy» bilen hem baglanyşyklydygyny aýdyp, olaryň garaşsyz gözegçilikden geçmeginiň zerurdygyny nygtapdy.
Awstraliýa bu babatda herekete geçip, çagalara sosial ulgamlaryny ulanmagy gadagan eden ilkinji ýurt boldy. 10-njy dekabrdan bäri bu ýurtda 16 ýaşyna ýetmedik şahslar üçin çäklendirmeler hereket edýär. Şoňa laýyklykda, on sany iri platforma, şol sanda TikTok, YouTube we Instagram ýetginjekleriň girmegini bökdemäge borçludyr.