Toyota kompaniýasy awtoulaglaryň multimediýa ulgamlary üçin ýöriteleşdirilen Fluorite atly hususy oýun hereketlendirijisini işläp düzmäge başlady. Bu taslama Toyota-nyň sanly hyzmatlar we interfeýsler üçin jogapkär bölümi bolan Toyota Connected North America tarapyndan amala aşyrylýar.
Täze hereketlendiriji, adatça, smartfonlardan we kompýuterlerden has pes hasaplaýyş kuwwatyna eýe bolan gurnalan awtoulag platformalary üçin niýetlenendir. Fluorite C++ dilinde ýazylan we Google-yň Flutter UI-freýmworky bilen utgaşykly işleýär.
Bu gurluş Dart dilini we Flutter gurallaryny ulanyp, agyr oýun hereketlendirijilerine mätäçlik duýmazdan, 3D elementli interaktiw interfeýsleri we ýönekeý oýunlary döretmäge ýol açýar.
Hereketlendiriji pes derejeli enjamlar üçin optimizirlenen bolup, Vulkan API-synyň goldawy arkaly grafikanyň çaltlandyrylmagyny üpjün edýär.
Kompaniýanyň düşündirmegine görä, Fluorite ilkinji gezek geljekki awtoulaglaryň 3D ulanyjy interfeýsleri (UI) üçin döredildi. Unity ýa-da Unreal Engine ýaly taýýar çözgütler awtoulag ulgamlary üçin örän "agyr", çylşyrymly we lisenziýa şertleri boýunça gymmat hasaplanýardy.
Toyota bu hereketlendirijini açyk kodly görnüşde ýaýratmagy meýilleşdirýär. Bu bolsa diňe bir kompaniýanyň öz işläp düzüjileriniň däl, eýsem üçünji tarap studiýalarynyň hem bu platforma üçin täze multimedia funksiýalaryny we awtoulag oýunlaryny döretmegine mümkinçilik berer.
