Nemes dogy tohumyndan bolan Minni lakamly it dünýäniň iň uly iti hökmünde Ginnesiň rekordlar kitabyna girdi. Adatça erkek itler daýaw bolýar diýlip hasap edilse-de, boýy gerişden ölçelende 97,5 santimetre ýetýän Minnini-de olardan kemlär ýaly däl.
Minnä eýelik edýän maşgala it doly inini-boýuny alýança garaşmagy ýüreklerine düwdiler. Geçen ýyl, it üç ýarym ýaşyny dolduranda bolsa Ginnesiň rekordlar kitabyna arza tabşyrdylar. Şeýlelikde Minni 2014- nji ýylda 96,4 santimetr boýy bilen rekord gazanmagy başaran Floridadaky Lizzi atly dogdan öňe geçmegi başardy.
Çempion it pyýada we awtomobilde gezelenç etdirseler gowy görýär. Şeýle-de ol frisbi oýnaýar we öz gowy görýän sary topuny hemişe agzy bilen ondan-oňa daşap ýörýär.
Minni Amerikanyň Konnektikut ştatyndaky Nort-Stonington şäheriniň ýaşaýjylary Ken we Liza Nogaçekleriň maşgalasynda saklanylýar. Olar iti iki aýlyk güjügi wagty alypdyrlar. Eýeleri Minniniň bir ýaşyna çenli dowamly ösendigini aýdýarlar. Nemes dogy iki ýarym ýaşyna ýetende bolsa has-da ulalyp, aşhanadaky stollaryň üstüne arkaýyn seredýän we ýatanda bir özi tas tutuş diwany eýeläp bilýän ekeni.
