Humanoid-iň robotlary ýeke-täk «beýnä» boýun bolup işlemäni öwrendiler

Humanoid kompaniýasy robotlaryň tutuş toplumy üçin ýeke-täk karar kabul ediş merkezi hökmünde işleýän KinetIQ dolandyryş ulgamyny tanyşdyrdy.
Bu platforma senagat we durmuş gurşawynda ammar araba-robotlaryndan başlap, iki aýakly gumanoidlere çenli gurluşy we maksady dürli-dürli bolan enjamlary dolandyrmaga mümkinçilik berýär.
Tehnologiýanyň işleýşi wideoda görkezildi. Birnäçe robot adam tarapyndan kesgitlenen çylşyrymly wezipäni bir wagtyň özünde ýerine ýetirýär. Tigirli androidler sargytlary ýygnaýarlar, konteýnerleri daşaýarlar we harytlary gaplaýarlar. Iki aýakly gumanoid bolsa ses arkaly aragatnaşyk saklap, zatlary alýar we harytlar bilen işleşmäge kömek edýär. Olaryň ählisi rollary paýlaýan we netijä gözegçilik edýän ýeke-täk ulgamyň gözegçiligi astynda hereket edýär.
KinetIQ her bir maşyny aýratynlykda sazlamagyň deregine,  umumy maksady kabul edýär, ony özbaşdak tapgyrlara bölýär we ýerine ýetirilişine gözegçilik edýär. Eger bir robot belli bir amala laýyk gelmese ýa-da ony başarmasa, tabşyryk başga birine geçirilýär.
Edil şonuň ýaly, maşynyň bir görnüşinde alnan tejribe beýlekileriň işini kämilleşdirmek üçin ulanylýar. Bu bolsa her  modeli işe başdan gözükdirme zerurlygyny aradan aýyrýar.
Humanoid kompaniýasy şeýle gurluşyň robotlaryň ýönekeý görkeziş dabaralaryndan hemişelik amaly ulanylyşa geçirilmegini çaltlandyrjakdygyna ynanýar.