Mercedes-AMG özüniň meşhur C-klass modellerini 2,0 litrlik dört silindrli hereketlendirijilere geçirmek synanyşygynyň garaşylan netijäni bermändigini boýun aldy. Kompaniýa müşderileriň isleglerini göz öňünde tutup, ýene-de uly göwrümli hereketlendirijilere dolanmak kararyna geldi. Bu barada AMG-niň baş direktory Mihael Şibe resmi habar berdi.
Müşderiler dört silindrli täze Mercedes-AMG C 43 we C 63 modellerini örän sowuk we sabyrlylyk bilen kabul etdiler. Şoňa görä-de, kompaniýa bu konfigurasiýadan doly ýüz öwürýär. Häzirki 2,0 litrlik C 43 we GLC 43 modelleri önümçilikden aýrylar. Olaryň ýerine eýýäm CLE 53 kupesinden tanyş bolan, 443 at güýjüni öndürýän 3,0 litrlik alty silindrli hereketlendirijiler gurlar.
Mihael Şibe täze Ýewro-7 ekologiýa standartlaryna laýyklykda dört silindrli motorlary sazlamagyň tehniki taýdan has kyn we gymmat düşýändigini düşündirdi. Mundan başga-da, ol alty silindrli hereketlendirjileriň premium awtoulaglara mahsus "duýguly seslenmesini" berýändigini, dört silindrli modellerde bolsa bu özboluşlylygyň ýitirilendigini belledi.
671 at güýjüne eýe bolan gibrid Mercedes-AMG C 63 hem satuwda we meşhurlykda esasy bäsdeşi bolan BMW M3-den yza galdy. Şunuň bilen baglylykda, Mercedes eýýäm Ýewro-7 kadalaryna laýyk gelýän täze 4,0 litrlik V8 hereketlendirijisini hödürledi. Resmi tassyklanmasa-da, bu motoryň ilki CLE 63-de, soňra bolsa ýene-de C 63-de peýda bolmagyna garaşylýar.
Täze nesil modelleriň işlenip düzülmegi çalt depginlerde dowam edýär. Geljekki C 53 modeli eýýäm täze BMW M5 bilen birlikde ýol synaglaryndan geçirilýär. Täzelenen hereketlendiriji düzümli modelleriň 2027-nji ýylda satuwa çykarylmagyna garaşylýar.
