Insaýder: OpenAI-iň çykarjak ilkinji enjamy Dime atly gulaklyk bolar

GSMArena neşiriniň berýän habaryna görä, OpenAI kompaniýasy özüniň ilkinji enjam görnüşli önümini hödürlemäge taýýarlanýar. Özi-de bu smartfon ýa-da kulon däl-de, eýsem, emeli aň bilen işleýän gulaklykdyr.
Başda kompaniýa emeli aň oturdylan kulon ýa-da ruçka diýen ýaly, has delräk enjamlary çykarmagy göz öňünde tutupdy. OpenAI-yň ýolbaşçysy Sem Altman dörediljek enjamyň smartfona görä has «asuda we rahatlandyryjy» bir zat bolmalydygyna aýratyn üns beripdi. Ol hatda bu pikirini Apple-iň öňki baş dizaýneri Joni Aýwy işe almak arkaly has-da berkitdi. Emma meýilnamalar üýtgedi we kompaniýa ilkibaşda ýönekeýräk önümden başlamak kararyna geldi.
Hytaý insaýderi zhihuipikachu-nyň Weibo jemgyýetçilik torunda aýtmagyna görä, munuň esasy sebäbi ýokary tizlikli HBM ýat kynçylygy sebäpli enjam bölekleriniň gymmatlamagy boldy. Şunlukda OpenAI enjam üpjünçiligini işläp düzmegiň gerimini wagtlaýynça gysgaltdy.
Gulaklyklaryň «Dime» diýlip atlandyrylmagyna garaşylýar. Olar 2026-njy ýylyň ahyryna çenli bazara çykarylyp bilner. Enjamyň häsiýetnamalary we bahasy barada biraz soňra habar berler.