Copilot emeli aň ulgamy indi Windows-a şeýle bir çuňňur ornaşdyryldy welin, hatda operasion ulgamy gurnamak prosesi (OOBE) doly tamamlanmanka-da çat-bot bilen söhbetdeş bolup bolýar. Bu gyzykly aýratynlyga inžener Rafael Riwera üns berdi we Windows-y täzeden gurnamak wagtynda alan ekran suratlaryny paýlaşdy.
Paýlaşylan suratlardan görnüşi ýaly, Copilot interfeýsi ulgamyň sazlamalary doly gutarylmazdan öň işjeňleşýär. Çat-bot Windows-yň gurnalmagyna päsgelçilik bermeýär. Ulgam arkaly gurnama dowam edýän wagty, ulanyjy Copilot-a sorag berip ýa-da beýleki funksiýalary synap bilýär.
Bu çözgüt ulanyjynyň garaşýan wagtyny gyzykly we peýdaly geçirmegi üçin niýetlenen diýlip çaklanylýar.
Häzirki zaman kompýuterlerinde Windows-y gurnamak adatça 10 minutdan köp wagt almaýan hem bolsa, Microsoft bu gysga wagtyň içinde ulanyjy bilen aragatnaşyk saklamagy maksat edinýär.
Mundan ozal hem kompaniýa garaşylýan pursatlary doldurmak üçin şuna meňzeş usullary ulanypdy. Mysal üçin, Edge brauzerinde internet birikmesi bolmadyk wagty oýnamak üçin niýetlenen "Edge Surf" oýnuny ýatlamak bolar. Indi bolsa Microsoft oýunlaryň deregine has akylly we kömekçi ulgamlary hödürleýär.
