Versace markasynyň döredijilik müdiri belgiýaly dizaýner Piter Mülýe bolar

Versace moda öýüniň döredijilik müdiri wezipesine belgiýaly dizaýner Piter Mülýe bellenildi. Bu barada Prada Group yglan etdi. Şertnama 2026-njy ýylyň 1-nji iýulyndan güýje girer diýip, Vogue neşiri habar berýär.
Mülýe bu wezipede bir ýyl hem eglenmän, 2025-nji ýylyň dekabrynda Versace-niň Prada Group tarapyndan satyn alynmagy baradaky geleşik tamamlanandan soň wezipesinden giden Dario Witaleniň ornuny tutar.
Mülýeniň bellenilmegi brendiň täze eýesiniň strategik ädimidir. Versace-niň  başlygy we Prada-nyň mirasdary Lorenso Bertelli Mülýeniň «brend üçin laýyk adamdygyny», onuň «Versace-niň ähli mümkinçiliklerini açmaga» we markanyň mirasy bilen baglanyşygy goldamaga ukyplydygyny belledi.
Mülýeniň kärýerasy Prada-nyň ikinji kreatiw direktory Raf Simons bilen baglydyr. Ol Jil Sander, Christian Dior we Calvin Klein ýaly moda öýlerinde Simonsyň «sag goly» bolupdy. 2021-nji ýyldan bäri Mülýe Alaïa moda öýüne ýolbaşçylyk edip, esaslandyryjynyň mirasyna bolan hormaty döwrebap çözgütleri bilen utgaşdyrdy. Onuň ýolbaşçylygynda brend ösüşe eýe boldy hem-de setkaly baletkalar we Le Teckel sumkasy ýaly meşhur modeller peýda boldy.
Indi Mülýe Versace markasynyň satuwlaryny durnuklaşdyrmaly we Amerikanyň Capri-siniň eýeçiliginde bolan döwründe birneme kütelişen brendiň özboluşlylygyny täzeden nygtamaly bolar.
2025-nji maliýe ýylynda Versace-niň girdejisi 15% peseldi. Seljerijiler italýan dolandyryşyna gaýdyp gelmegiň täze ösüş mümkinçiliklerini açyp biljekdigini hasaplaýarlar.