2026-njy ýylyň 6–15-nji fewraly aralygynda Abu-Dabide taryhda ilkinji Open Masters Games multi-sport ýaryşy geçiriler. Bu barada Gulf News neşiri habar berýär. Bu uly göwrümli sport çäresi Al-Aýn we Al-Dafra şäherlerini hem gurşap alar.
Ýakyn Gündogarda iň uly ýaryş dünýäniň 92 ýurdundan 25 000-den gowrak türgeni bir ýere jemlär.
Guramaçylar 500 000-den gowrak tomaşaçynyň bolmagyna garaşýar. Ýaryşlaryň maksatnamasyna sportuň ýeňil atletika, basketbol, küşt, welosport, futbol, golf, karate, suwda ýüzmek, tennis, agyr atletika we bouling ýaly 38 görnüşi girizildi. Olaryň arasynda 13-üsi mümkinçiligi çäkli adamlar üçin bolup, 6-sy düýeli ýaryş, laçyn awy we dou gaýyklarynda ýelkenli sport ýaly emirlikleriň däp bolan oýunlarydyr.
Ýaryşlar 7200 meýletinçiniň we 30-dan gowrak hyzmatdaşyň goldaw bermeginde 38 sany sport desgasynda geçiriler.
Taslama Halkara weteranlar sport assosiasiýasynyň (IMGA) goldamagynda amala aşyrylýar we Halkara Olimpiýa komiteti (HOK) tarapyndan resmi taýdan ykrar edildi. Oýunlaryň esasy konsepsiýasy kwalifikasiýa böwetleriniň bolmazlygydyr, bu bolsa 30 ýaşdan 70 ýaşa çenli we ondan uly bolan, islendik taýýarlyk derejesindäki türgenlere gatnaşmaga mümkinçilik berýär.
Sport çäresiniň geçirilmegi bäş ulgamy: saglygy goraýşy, sosial integrasiýany, ykdysadyýeti, sporty we sebitiň uzak möhletleýin mirasyny ösdürmäge gönükdirilendir.
Abu-Dabi taryhda ilkinji Open Masters Games multi-sport ýaryşyny kabul edýär
- düýn 23:31
- 234
