Halkara futbol federasiýasy Birleşen Arap Emirliklerinde ýerleşýän ADI Predictstreet kompaniýasy bilen köp ýyllyk şertnama baglaşdy we bu guramanyň taryhynda täjirçilik oýunlaryny çaklamak boýunça ilkinji hyzmatdaşy bolar. The Financial Times gazetiniň öz çeşmelerine salgylanyp berýän habaryna görä, şertnamanyň bahasy azyndan 300–400 million dollara barabar bolar.
Blokçeýn gurluşy arkaly işleýän platforma 2026-njy ýyldaky dünýä çempionatynyň janköýerleri üçin mugt global çaklama bäsleşiginiň hyzmatdaşy bolup çykyş eder.
ADI Predictstreet-iň önümi resmi taýdan aprel aýynda satuwa çykarylar. Şonda ulanyjylar FIFA-nyň maglumat bazasyny ulanyp, oýunlaryň netijelerini çaklap we iň gowy oýunçylary kesgitläp biler diýip garaşylýar.
Geleşigiň gerimine garamazdan, synagdan geçirilen önümi bolmadyk, az tanalýan kompaniýanyň saýlanmagy bilermenlerde sorag döredýär diýip, The Athletic neşiri belleýär. Häzirki wagtda platformanyň diňe Gibraltarda işlemek üçin ygtyýarnamasy bar, bu bolsa onuň beýleki ýurtlardaky kanuny statusyny näbelli bolmagynda galdyrýar.
Açyklygy üpjün etmek üçin ADI Predictstreet hakyky wagtda gözegçilik ulgamyny ulanmagy meýilleşdirýär. Howpsuzlyk meselesini üpjün etmeklige, megerem, FIFA-nyň 2026-njy ýylyň martynda şertnamasyny uzaldan firmasy bolan Şweýsariýanyň Sportradar-y çekiler. Sportradar bilen baglaşylan şertnamanyň bahasy 500 million dollara deňdir. ADI Predictstreet-iň taslamasy emirligiň hökümdar maşgalasy tarapyndan dolandyrylýan, Abu-Dabidäki IHC holding kompaniýasy bilen baglanyşyklydyr, bu bolsa Ýakyn Gündogar maýadarlarynyň global futbola artýan täsirini görkezýär.
Hyzmatdaşlyk 2026-njy ýyldaky Dünýä çempionatynyň başlanmagyna üç aýdan azrak wagt galanda başlanar. FIFA eýýäm 16 hemaýatkärlik ornunyň hemmesini berdi we ýyllyk rekord derejede 8,9 milliard dollar girdeji gazanmagy meýilleşdirýär. Ilkinji gezek üç ýurtda geçiriljek ýaryşyň baýrak gaznasy 655 million dollara barabar bolar, ýeňiji bolsa 50 million dollar alar.
