2026-njy ýylyň 5-nji fewralynda Türkmenistanyň Daşary işler ministrliginde ýurduň BMG-niň Azyk we oba hojalyk guramasy (FAO) bilen hyzmatdaşlygyna bagyşlanan brifing geçirildi.
Çärä Türkmenistanyň DIM-iniň ýolbaşçylary we işgärleri, ýurtda akkreditirlenen diplomatik wekilhanalaryň, halkara guramalaryň ýolbaşçylary we wekilleri, şeýle hem köpçülikleýin habar beriş serişdeleriniň wekilleri gatnaşdy.
Brifingde Türkmenistanyň daşary işler ministriniň orunbasary Mähri Bäşimowa, şeýle hem göni wideoaragatnaşyk arkaly FAO-nyň Baş direktorynyň orunbasary, Ýewropa we Merkezi Aziýa boýunça Sebitleýin wekili Wiorel Gusu çykyş etdi.
Gatnaşyjylara Türkmenistanyň FAO bilen hyzmatdaşlygynyň häzirki ýagdaýy we geljekki mümkinçilikleri, gazanylan netijeler hem-de mundan beýläkki özara hereketleriň ileri tutulýan ugurlary barada maglumat berildi.
FAO-nyň Baş direktory Sýuý Dunýuýuň 2026-njy ýylyň ýanwar aýynda Aşgabada amala aşyran resmi saparyna aýratyn üns berildi, bu sapar hyzmatdaşlygyň strategik häsiýetini tassyklady.
Şeýle hem FAO-nyň Türkmenistandaky wekilhanasyny açmak üçin hukuk esasyny döreden Kabul ediji ýurt hakyndaky Ylalaşyga gol çekilmeginiň ähmiýeti bellenilip geçildi.
Hyzmatdaşlygyň 2021–2025-nji ýyllar üçin niýetlenen Ýurt boýunça çarçuwaly maksatnamasynyň tamamlanandygy we 2026–2030-njy ýyllar üçin täze maksatnamanyň üstünde işleriň başlanandygy barada habar berildi. Brifingiň ahyrynda sorag-jogap sessiýasy geçirildi.
Türkmenistanyň DIM-inde FAO bilen hyzmatdaşlygyň netijeleri we meýilnamalary maslahatlaşyldy
- 05.02.2026 23:01
- 1.9k+
