Pepper seriýalaýyn öndürilen adam şekilli ilkinji robot hökmünde rekordlar kitabyna girdi

Janly gatnaşyk arkaly adamlar bilen özara täsirleşmek maksatly işlenip düzülen Pepper özüniň döredilen wagtyndan – 2014-nji ýylyň 5-nji iýunyndan bäri  söwda merkezleri, mekdepler, garrylar öýleri ýaly  dürli jemgyýetçilik ýerlerinde ulanylyp ýör.
2-nji fewralda Ýaponiýanyň SoftBank Robotics kompaniýasy Pepper robotynyň Ginnesiň rekordlar kitaby tarapyndan dünýäde seriýalaýyn öndürilýän ilkinji adampisint hyzmat ediş roboty hökmünde ykrar edendigini mälim etdi.
Şeýle-de SoftBank Robotics kompaniýasy Pepperiň  iň täze emeli aň tehnologiýalary esasynda has kämilleşdirilen görnüşi bolan Pepper+ robotyny hem hödürleýär. Bu robot adamlar bilen diňe bir gatnaşyk arkaly täsirleşmän, eýsem adaty satyjynyň işini we başarnygyny nusga edinip,  müşderileriň isleglerine laýyklykda harytlar boýunça maslahat bermek we teklip hödürlemek ýaly hyzmatlary hem amala aşyrýar. Robot özündäki kameralaryň kömegi bilen alyjylary tanaýar we olaryň geýnişlerine hem-de şahsy aýratynlyklaryna esaslanyp, her haýsynyň özüne görä aragatnaşyk guraýar. 
Bahalandyryş barada aýdylanda bolsa, Pepper+ robotyny uzak möhletleýin (ýyllyk) kärendesine almagyň bahasy aýda 79 800 iýene (aýda 515 dollara) deňdir. Gysga möhletleýin kärende şertlerinde Pepper+ aýda 150 000 iýene deň bolýar. Şertnama boýunça ilkinji tölegler aýrybaşga görnüşde alynýar.