Marokkoda güýçli ýagyşlar we derýa joşgunlary halky howp astynda goýdy. Häkimiýetler siliň gelmegi ähtimallygy zerarly ýurduň demirgazygyndaky Ksar-el-Kebir şäheriniň ýaşaýjylaryny köpçülikleýin ewakuasiýa edip başladylar.
Bloomberg agentliginiň habar bermegine görä, ýaşaýjylara kömek etmek üçin ýüzlerçe awtobus we howpsuzlyk gulluklarynyň işgärleri çekildi. Takmynan 120 000 ilatly şäheriň köçelerinde eýýäm ýaşaýyş toplumlaryny suw basdy, etraplaryň bir bölegi bolsa elektrik üpjünçiliginden kesildi.
Güýçli ýagyşlar we Lukus derýasynyň joşmagy Lukkus sebitiniň peslik ýerleriniň suw astynda galmak howpuny has-da artdyrdy. Dekabr aýyndan bäri ýagan ygal geçen ýyl bilen deňeşdirilende 215% artdy we köp ýyllyk ortaça derejeden 54% ýokary boldy. Ýurduň demirgazyk-günbataryndaky aýry-aýry etraplaryň oba hojalyk ýerleri we ilatly nokatlary eýýäm suw astynda galdy.
Içeri işler ministrliginiň maglumatlaryna görä, Ksar-el-Kebirde uly ewakuasiýa işleri geçirilýär: ýaşaýjylaryň takmynan 85%-i, ýagny azyndan 108 432 adam eýýäm öýlerini terk etdi. Halas ediş çärelerinde dikuçarlary hem ulanýarlar.
Mundan ozal güýçli ýagyşlar Ispaniýanyň we Portugaliýanyň günortasyna hem täsir edipdi. Şol sebäpli Ispaniýada suw basmak howpy üçin ýokary taýýarlyk derejesi saklanyp galýar.
