The Walt Disney Company korporasiýasynyň täze baş direktory (CEO) wezipesine ozal kompaniýanyň dynç alyş seýilgähleri bölümine ýolbaşçylyk eden Joş D’Amaro belleniler. Bu barada kompaniýa özüniň resmi saýtynda habar berdi.
The Walt Disney Company-nyň müdirler geňeşiniň başlygy Jeýms Gorman korporasiýanyň geljekki ýolbaşçysynyň hünärmen häsiýetlerine ýokary baha berdi: «Joş D’Amaro ruhlandyryjy ýolbaşçylyk we täzeçillik ukybynyň seýrek utgaşygyna, strategik ösüş mümkinçiliklerine bolan ýiti duýgurlyga hem-de Disney brendine we onuň işgärlerine bolan çuňňur söýgä eýedir. Bu aýratynlyklaryň ählisi ony Disney-iň indiki baş direktory wezipesine tüýs mynasyp dalaşgär edýär».
D’Amaro 54 ýaşynda. Ol täze wezipä bellenilmezinden ozal Disney-iň tematik seýilgähler we kruiz gämileri bölümini dolandyrýardy. Ol kompaniýa 1998-nji ýylda geldi, ondan öň bolsa Gillette kompaniýasynda menejer bolup işledi. Disney-de işlän döwründe Kaliforniýadaky, Gonkongdaky we Floridadaky dynç alyş seýilgählerinde ýolbaşçy wezipelerini eýeledi.
Joş D’Amaro bu wezipede korporasiýany 15 ýyldan gowrak dolandyran Bob Aýgeri çalşar. Müdirler geňeşi iki sany dalaşgäri — D’Amarony we Disney-iň telewideniýe hem-de striming biznesine jogap berýän Dan Uoldeni gözden geçirdi.
Bob Aýger hem öz ornuny tutjak hünärmen barada pikirini aýdyp, D’Amarony «ajaýyp lider we biziň indiki baş direktorymyzyň wezipesi üçin iň laýyk gelýän dalaşgär» diýip häsiýetlendirdi.
