50 ýyl garaşyldy, ýene bir aý sabyr ediň: Aýa ekipažly uçuş eglenýär

NASA agentligi Aýa ekipažly Artemis II missiýasynyň uçuş wagtyny fewral aýyndan mart aýyna geçirdi. Bu barada agentligiň ýolbaşçysy Jared Aýzekman uçuşyň baş taýýarlyk işleriniň netijeleri boýunça habar berdi.
«Şu gün uçuşyň baş taýýarlyk işleri tamamlandy we biz fewraldaky uçuşy marta geçirýäris. Indi bu Artemis II missiýasynyň uçuşy üçin iň irki möhlet bolar. SLS raketasynyň uçuşlarynyň arasynda üç ýyldan gowrak arakesmäniň bolandygyny nazara alyp, biz kynçylyklaryň ýüze çykmagyna garaşdyk. Şonuň üçin biz baş taýýarlygy geçirýäris. Bu synaglar uçuşdan öň meseleleri ýüze çykarmaga we uçuş gününiň üstünlikli bolmak ähtimallygyny ýokarlandyrmaga gönükdirilendir.
Synag wagtynda toparlar ýangyç guýulýan mahaly esasy basgançagyň birleşýän ýerinde suwuk wodorodyň syzmagyny düzetmegiň üstünde işledi. Bu bolsa enjamlary gyzdyrmak we ýangyç akymyny sazlamak üçin arakesme etmegi talap etdi. Muňa garamazdan, esasy basgançagyň we aralyk kriogen hereketlendiriji gurluşynyň ähli baklary üstünlikli dolduryldy. Emma ýangyjyň has tiz syzyp başlamagy sebäpli, wagtyň yza sanalmagy, takmynan, T-5 minut görkezijisine ýetende, uçuşyň ýerdäki ugrukdyryjysy işi saklady.
Goşmaça faktorlaryň hatarynda Orion kosmos gämisiniň uçuşa taýýarlyk işleriniň uzak dowam etmegi, ýerüsti ses ulgamyndaky wagtlaýyn bökdençlikler, pes temperaturanyň käbir kameralara täsiri, şeýle hem ekipažyň howpsuzlygyny üpjün etmek üçin Orion-y gaz arkaly arassalamagyň täzelenen usullarynyň üstünlikli synagy bar» – diýip, Jared Aýzekman belledi.
Ol howpsuzlygyň ileri tutulýan ugurdygyny nygtady: «Biz diňe şu taryhy missiýa taýýardygymyza doly ynamly bolan wagtymyz uçuşa başlarys... Topar maglumatlaryň doly seljermesini geçirer, WDR wagty ýüze çykan her bir meseläni düzeder, zerur abatlaýyş işlerini amala aşyrar we synaglara gaýdyp geler. Biz goşmaça baş taýýarlygy geçirip, soňra mart döwrüne ünsi jemlemegi göz öňünde tutýarys».