Hytaýda elektron galyndylaryndan altyn alnyşyny görkezýän wideonyň meşhurlyk gazanmagyndan soň, ulanylan sim-kartalary köpçülikleýin satyn almak meýli başlandy. Bu barada «South China Morning Post» neşiri habar berýär.
Wideony metal galyndylaryny gaýtadan işleýän, internetde şeýle tejribeleri bilen tanalýan Sýao atly hünärmen çap etdi. Ol wideoda birnäçe himiki reaksiýalardan soň 191 gram altyn alandygyny görkezdi. Onuň aýtmagyna görä, alnan metalynyň bahasy takmynan 29 müň dollara deňdir.
Bu wideo 5 milliondan gowrak gezek görüldi we sim-kartalara bolan islegiň çendenaşa artmagyna sebäp boldy. Ýöne Sýao bu tejribäni özbaşdak gaýtalamak isleýänlere onuň howply taraplary barada duýduryş berdi.
Näme üçin bu tejribe howply we peýdasyz?
- Zäherli gazlar: Altyn almak üçin konsentrirlenen güýçli kislotalar ulanylýar. Reaksiýanyň temperaturasy, wagty ýa-da pH derejesi sähel üýtgän ýagdaýynda hem zäherli gazlar bölünip çykyp bilýär.
- Çig malyň möçberi: Sýao 191 gram altyn almak üçin diňe bir sim-karta däl, eýsem jemi iki tonna golaý elektron galyndylaryny (mikroshemalar we ş.m.) ulanandygyny aýtdy.
- Bir sim-kartadaky altyn: Adaty bir sim-kartanyň düzüminde 0,001 gramdan hem az altyn bar. Altyn diňe kontaktlary poslamadan goramak üçin örtük hökmünde ulanylýar.
Kanuny jogapkärçilik
Bu tejribe diňe bir howply we ykdysady taýdan peýdasyz bolman, eýsem bikanun hem hasaplanýar. Hytaýda altyn öndürmek we onuň dolanyşygy berk gözegçilikde saklanýar. Gymmat bahaly metallary gaýtadan işlemek üçin ýörite sertifikat talap edilýär. Kanun bozulan ýagdaýynda azatlykdan mahrum edilip, 72 müň dollara çenli jerime bellenilip bilner.
