Spotify striming hyzmaty 2025-nji ýylyň jemi boýunça sazandalara we awtorlyk hukugynyň eýelerine 11 mlrd dollardan gowrak töledi diýlip, kompaniýanyň resmi beýanynda habar berilýär. Bu görkeziji platforma üçin rekord bolup, geçen ýylky netijeden, takmynan, 1 mlrd dollar köpdür.
Hyzmatyň berýän maglumatlaryna görä, görkezilen mukdar tutuş aýdym-saz pudagynyň umumy girdejisiniň, takmynan, 30%-ini emele getirýär. Bu möçbere petekleriň, ýadygärlik sowgatlaryň satuwyndan, podkastlardan we audiokitaplardan gelýän girdejiler girmeýär. Serişdeler göni hukuk eýelerine: ses ýazýan leýbllere, aýdym-saz çykaryjylara we distribýutorlara berilýär. Spotify artistleriň alýan ahyrky girdejisiniň hususy şertnamalara baglydygyny belleýär: iri leýbllerde ýerine ýetirijiler üçin töleg, takmynan, 15% bolsa, garaşsyz guramalar 50% we ondan hem ýokary mukdary hödürleýär.
Awtorlaryň girdejilerini goramak üçin platforma spam-kontentlere we kezzaplyklara garşy göreş gurallaryny girizmegi meýilleşdirýär.
«Betniýetli şahslar hakyky ýerine ýetirijileriň girdejisini ogurlamak maksady bilen, striming hyzmatlaryny pes hilli "zibiller" bilen doldurmak üçin emeli aňy ulanýar» diýlip, Spotify-yň habarynda aýdylýar. Şeýle kezzaplyk bilen göreşmek üçin hyzmat werifikasiýa ulgamyny täzelemek isleýär.
Spotify 2025-nji ýylda sazandalara rekord 11 milliard dollar töleg töledi
- 02.02.2026 01:40
- 1k+
