Dubaýda Emirligi ösdürmegiň «20 minutlyk şäher» konsepsiýasynyň we ýene-de iki sany strategik başlangyjynyň amala aşyrylmagy tassyklanyldy. «Dubai10X» maksatnamasynyň çägindäki degişli taslamalary Dubaýyň mirasdüşer şazadasy, BAE-niň Premýer-ministriniň orunbasary we Goranmak ministri şeýh Hamdan ben Mohammed Al Maktum makullady.
«20 minutlyk şäher» konsepsiýasy ýaşaýjylara esasy hyzmatlaryň 80%-ine çenli bölegini pyýada ýa-da ekologik ulaglarda aňrujy 20 minutda elýeterlik çäginde almaga mümkinçilik berer.
Synag zolagy ýol howpsuzlygy boýunça çäreleri, saýaly ýaşyl meýdançalary döretmegi we çeýe ulag ýodalaryny ornaşdyrmagy öz içine alar. Al Barşa 2 raýonynda bu boýunça işlere eýýäm badalga hem berildi.
Makullanylan ikinji taslama - keselleri, hususan-da süýji keselini irki döwürde anyklamaga gönükdirilendir. Ol «Canadian Specialist Hospital», «Aster Clinics» we «King’s College Hospital London» ýaly edaralaryň gatnaşmagynda amala aşyrylar.
Üçünji başlangyç bolsa, uçar gatnawlaryna ýolagçylary hasaba almagyň tutuş şäher boýunça ulgamyny we ýolagçylary göni aeroportyň uçuş zolagyna eltmegi ýola goýýar.
Şeýh Hamdan döwlet dolandyryşynyň netijeliligini çaltlandyrmagyň Dubaýyň geljekki strategiýasynyň esasy bölegidigini nygtady.
Dubaý «20 minutlyk şäher» konsepsiýasyny ornaşdyrýar
- düýn 16:31
- 3.3k+
