Howa arkaly 120 Gbit/s: alymlar örän çalt işleýän simsiz maglumat ugradyş ulgamyny döretdiler

Irwaýndaky Kaliforniýa uniwersitetiniň (UC Irvine) barlagçylary maglumatlary sekuntda 120 Gbit (takmynan sekuntda 15 gigabaýt) tizlikde geçirmäge ukyply simsiz kabul ediji-geçirijini işläp düzdüler.
Deňeşdirmek üçin: «Wi-Fi 7» ulgamynyň nazary taýdan iň ýokary çägi 30 Gbit/s töweregi, «5G mmWave» aragatnaşyk ulgamynyňky bolsa 5 Gbit/s çenli ýetýär. 
UC Irvine News neşiriniň habar bermegine görä, bu tizlik maglumat merkezlerindäki we täjirçilik torlaryndaky optiki-süýümli kabelleriň geçirijilik ukyby (takmynan 100 Gbit/s) bilen bäsleşip bilýär.
Ylmy işiň esasy awtory Szisun Wan düzgünleşdiriji edaralaryň we 6G standartlaryny işläp düzýän hünärmenleriň 100 GGs-den ýokary diapazony aragatnaşygy ösdürmegiň indiki ädimi hökmünde görýändiklerini belledi. Sanly-analog öwrüjileri (SAÖ) ulanýan adaty ugrudyjylar şeýle tizliklerde has çylşyrymly bolýarlar we energiýany aşa köp sarp edýärler.
«UC Irvine topary özara sazlaşykly işleýän üç sany kömekçi geçirijini ulandy. Bu bolsa energiýa sarp edilişini 230 milliwatta çenli peseltmäge mümkinçilik berdi. Deňeşdirmek üçin, sekuntda 120 Gbit tizlikde işleýän adaty SAÖ-ler birnäçe watt energiýa sarp edýärler, bu bolsa smartfonlar we mobil enjamlar üçin örän köp hasaplanýar.
Nano-aragatnaşyk integral shemalary barlaghanasynyň ýolbaşçysy Paýam Heýdari energiýa köp sarp edýän sanly çözgütleriň deregine analog hasaplamalarynyň ulanylmagynyň netijeliligi ýokarlandyrýandygyny nygtady. Täze çip 22 nanometrlik FD-SOI tehnologiýasy arkaly taýýarlandy. Bu usul «TSMC» we «Samsung» ýaly öňdebaryjy kompaniýalaryň tehnologiýalaryndan has ýönekeý we arzan bolup, täze açyşyň giňden ornaşdyrylmagyna mümkinçilik berýär.
Işläp düzüjiler bu tehnologiýanyň geljekde maglumat merkezlerindäki ençeme kilometr kabelleriniň ornuny tutup, düzümleýin çykdajylary we hyzmat ediş çykdajylaryny ep-esli azaldyp biljekdigine ynanýarlar.