Bu-da emeli aň sebäpli: App Store-da täze iOS goşundylarynyň sany 60 göterim ýokarlandy

Birnäçe ýyllap dowam eden durgunlykdan soň, «App Store» dükanynda täze goşundylaryň sanynyň çalt depginler bilen artýandygy hasaba alyndy. Sensor Tower we Wells Fargo Securities kompaniýalarynyň maglumatlaryna görä, 2025-nji ýylyň dekabr aýynda täze iOS goşundylarynyň sany geçen ýylyň degişli döwri bilen deňeşdirilende 60 göterim artdy. Soňky 12 aýyň jemleri boýunça bolsa ösüş 24 göterime deň boldy.
Mundan ozalky üç ýylyň dowamynda bu görkeziji nola golaýdy, ýagny täze goşundylaryň goşulyş ýygylygy takmynan bir derejede saklanypdy. Seljermeciler häzirki böküşli ösüşi emeli aň gurallarynyň ýaýramagy we çuňňur tehniki bilimi bolmadyk ulanyjylaryň hem programma döretmegini ýönekeýleşdirýän «waýb-koding» (vibe-coding) usuly bilen baglanyşdyrýarlar.
Seljermäniň awtorlary şu günki ýagdaýy Apple kompaniýasynyň «iPhone SDK» ulgamyny tanyşdyran 2008-nji ýyly bilen deňeşdirýärler. Şol wagt «App Store» bary-ýogy 500 töweregi üçünji taraplaýyn goşundy bilen işe başlap, gysga wagtyň içinde ägirt uly ekoulgama öwrülipdi.
Olaryň pikiriçe, emeli aň şuna meňzeş täze bir döwrüň başyny başlap, mobil goşundy bazaryny uly ösüş tapgyryna çykaryp biler.