27-nji ýanwarda Los-Anjelesde amerikan maşgalalarynyň we mekdep okruglarynyň ýüzlerçesi Meta, Snap, TikTok hem-de YouTube korporasiýalaryna garşy beren köpçülikleýin şikaýat arzalary boýunça kazyýet işleri başlandy. Bu barada The Guardian gazeti habar berýär.
Şikaýatçylar bu kompaniýalaryň bilkastlaýyn endik dörediji sanly önümleri işläp düzendiklerini öňe sürýärler. Olaryň pikiriçe, bu platformalary ulanmak çagalarda we ýetginjeklerde depressiýa, iýmitleniş ulgamynyň bozulmagy hem-de beýleki çynlakaý ruhy saglyk meselelerine sebäp bolýar.
Bir kazyýet önümçiligine 350-den gowrak maşgaladan we 250 sany okuw mekdebinden gelen 1600-e golaý şikaýat arzasy birleşdirildi. Ilkinji bolup 19 ýaşly KGM atly gyzyň işine serediler, ol örän ýaş wagtyndan sosial torlara garaşly bolandygyny aýdýar. Jemi ýigrimä golaý görkezme kazyýet işini geçirmek meýilleşdirilýär.
Şikaýatçylar diňe bir maliýe öwezini dolmak däl, eýsem kompaniýalaryň platformalaryň dizaýnyny üýtgetmäge mejbur etjek kazyýet gadaganlygyny girizmegi hem talap edýärler. Bu ýerde "çäksiz lentanyň" we wideolaryň awtomatiki goýberilmegi ýaly funksiýalara gaýtadan seretmek, şeýle-de kämillik ýaşyna ýetmedikleri goramak üçin hökmany howpsuzlyk standartlaryny girizmek barada gürrüň gidýär.
Aklawçylar bu strategiýany 1990-njy ýyllarda temmäki senagatyna garşy açylan kazyýet işleri bilen deňeşdirýärler we kompaniýalaryň öz algoritmleriniň zyýany barada bilip, hiç hili çäre görmändikleri baradaky pikiri tutanýerlilik bilen öňe sürýärler. Kazyýetde sosial torlaryň "neşe" bilen deňeşdirilýän içki resminamalarynyň aýan edilmegine garaşylýar.
Diňlenişigiň öňüsyrasynda Snap kompaniýasy KGM-niň işini kazyýetden daşary tertipde düzgünleşdirdi.
