Levi Strauss & Co. kompaniýasy ýaşlara egin-eşikleri abatlamagyň esaslaryny öwretmäge gönükdirilen «Levi’s Wear Longer» atly bilim taslamasyny işläp taýýarlady. Bu maksatnama ABŞ-nyň mekdepleriniň 9–12-nji synp okuwçylary üçin niýetlenendir.
Taslamanyň okuw gollanmalary mugt bolup, olar «Discovery Education» platformasynyň üsti bilen ulanylyp bilner. Mekdep okuwçylary eşikleriň iliklerini dakmakdan başlap, olary öz ölçegiňe görä sazlamaga çenli bolan başlangyç işleri öwrenerler. Bu taslama ýaşlara egin-eşikleri has uzak wagtlap ulanmaga, zyňylýan zatlaryň mukdaryny azaltmaga we sarp edişe has jogapkärli çemeleşmäge kömek eder.
Şeýle-de, bu taslama öňler maşgalada öwredilýän ýa-da zähmet sapaklarynda geçilýän, emma wagtyň geçmegi bilen seýreklän amaly endikleri täzeden bilim gurşawyna gaýtarýar.
Brendiň sargydy bilen geçirilen barlaglara görä, Z nesliniň (1997-2012 ýyllar aralygynda doglanlar) 41 %-i egin-eşikleri tikmek ýa-da ýamamak ukybyna eýe däl.
Mekdeplerde geçiriljek amaly tejribe sapaklaryny Levi Strauss & Co. kompaniýasynyň hünärmenleri alyp bararlar. Taslama San-Fransisko şäherinde ýerli okuwçylar üçin geçiriljek ilkinji sapak bilen başlanar we soňra ony ABŞ-nyň beýleki sebitlerine hem ýaýratmak meýilleşdirilýär.
Levi’s brendi amerikan mekdep okuwçylaryna egin-eşikleri tikmegi we ýamamagy öwreder
- 27.01.2026 21:48
- 1.7k+
