Dekabr aýynyň başynda The Verge neşiri Google-yň "Discover" lentasyndaky asyl sözbaşylary mazmunyna hemişe kybap gelip durmaýan, emeli aň (EA) tarapyndan döredilen sözlemler bilen çalşyp başlaýandygyny habar beripdi. Kompaniýa şol wagt bu ýagdaý barada düşündiriş bermedi, ýöne soňra bu funksiýanyň "netijeli işleýändigini" we yzygiderli ýalňyşlyklara garamazdan, ulanyjylaryň göwnünden turýandygyny mälim etdi.
Google makalalaryň sözbaşylaryny gaýtadan ýazmaýandygyny, gaýtam okyjylara "aktual temalary" görkezýändigini öňe sürýär. Bu temalar hiç hili goşmaça fakt barlagy geçirilmezden, asyl materiallara salgylanmalar we suratlar bilen bilelikde, belli bir köpçülikleýin habar beriş serişdeleriniň hususy materialy ýaly wizual görnüşde hödürlenýär.
The Verge neşiri wagtyň geçmegi bilen ulgamyň has seresaply işläp başlandygyny, ýagny sözbaşylaryň has giňeldilendigini we lentada aç-açan "klikbeýtleriň" (aldawçy sözbaşylaryň) azalandygyny belleýär.
Şeýle-de bolsa, emeli aň henizem faktlary we konteksti bulaşdyrýar. "Discover" lentasynda ABŞ-da daşary ýurt dronlarynyň importyna goýlan gadagançylygyň ýatyrylandygy baradaky ýalan habarlar, aslynda ýok bolan tehnologik täzelikler we makala çap edilmezden has öň bolup geçen wakalar peýda boldy. Käbir ýagdaýlarda sözbaşy bir zady wada berse, açylan material düýbünden başga zat barada gürrüň berýärdi.
"Gysgaça synyň sözbaşysy dürli saýtlardan alnan maglumatlary özünde jemleýär we ol aýratyn bir makalanyň sözbaşysy hökmünde täzeden ýazylmaýar. Bu funksiýa ulanyjylary kanagatlandyrjak derejede gowy işleýär. Biz adamlara internetdäki materiallary öwrenmäge we salgylanmalar boýunça geçmäge kömek etmek üçin ulanyjy interfeýsi bilen synaglary dowam etdireris" — diýip, Google-yň metbugat wekili Jennifer Kuts belledi.
