Hytaýda awtoulaglar diňe hökmany ýol synagyny geçenden soň satuwa çykarylar

Hytaýyň Senagat we maglumatlaşdyryş ministrligi awtoulaglaryň hilini barlamagyň täze kadalaryny tassyklady. Bu düzgünler 2027-nji ýylyň 1-nji ýanwaryndan güýje girer. Üýtgeşmeleriň esasy maksady — mundan ozal J.D. Power agentliginiň belläp geçen awtoulag ygtybarlylygynyň peselmeginiň öňüni almakdyr.
Gözegçilik ediji edaranyň maglumatlaryna görä, hiliň peselmegi bazardaky ýokary bäsdeşlik bilen baglanyşyklydyr. Öndürijiler alyjy ugrundaky göreşde täze modelleri taýýarlamagyň möhletini gysgaldýarlar we bazara doly kämilleşdirilmedik modelleri çykarýarlar. Täze talaplar bu ýagdaýy üýtgetmäge gönükdirilendir.
Tassyklanan standartlara laýyklykda, benzinli hereketlendirijisi bolan her bir täze model satuwa çykarylmazdan ozal, 30 müň kilometr aralygy geçip, çydamlylyk synagyndan geçmäge borçludyr. Synaglaryň ähli netijeleri resmi taýdan hasaba alynmalydyr.
Synag usullary awtoulagyň görnüşine baglylykda tapawutlanýar. Ýeňil awtoulaglar hem-de kuzowy bilen şassisi bitewi krossowerler diňe az ýükli ýagdaýda we esasan marşrutyň 55 göterimini tutýan şäher şertlerinde has oňaýly tertipde synalar. Ramaly wnedorožniklere goýulýan talaplar has berk bolup, synaglar doly ýükli ýagdaýda hem-de esasy üns ýokary tizlikli ýollara, dag ýollaryna we çagyl düşelen ýerlere berilmek arkaly geçiriler.
Elektromobiller we gibridler üçin synag ýolunda hökmany geçilmeli aralygyň 15 müň kilometre çenli azaldylanlygy-da bellärliklidir.