TikTok platformasynyň taryhynda iň köp abunaçysy bolan (takmynan 270 million adam) bloger Habi Leým özüniň «Step Distinctive Limited» kompaniýasynyň bir bölegini Amerikanyň «Rich Sparkle Holdings» firmasyna 975 million dollara satdy.
Ylalaşygyň şertlerine görä, öňümizdäki üç ýylyň dowamynda «Rich Sparkle Holdings» Leýmiň dünýä derejesindäki ähli girdeji ugurlaryny dolandyrmaga eksklýuziw hukuk alýar. Bulara - mahabat şertnamalary; ygtyýarlandyrma işleri hem-de onuň ady bilen harytlaryň satuwy (merçandaýzing) degişlidir.
Bu söwdadan soň blogeriň girdejisi aýratyn mahabat şertnamalaryna däl-de, eýsem onuň brendiniň töwereginde guruljak biznesiň umumy üstünligine bagly bolar. «Rich Sparkle-yň» wekilleri munuň "kontentli elektron söwda modelinde hakyky rewolýusiýadygyny" belleýärler.
Şertnamanyň iň täsin bölümi — Habi Leýmiň emeli aň tehnologiýalarynyň kömegi bilen özüniň sanly ekiztaýyny (AI-copy) döretmäge razylyk bermegidir. Onuň keşbi, sesi we özüni alyp barşy bilen döredilen AI-nusgasy dürli dillerde, gije-gündizläp göni ýaýlymlar alyp biler we täjirçilik işleri bilen meşgullanar. Bu blogere fiziki taýdan gatnaşmazdan, öz auditoriýasyny has-da giňeltmäge we brendiniň mümkinçiliklerini artdyrmaga ýol açar.
