Microsoft kompaniýasy Windows 11 ulanyjylary üçin «Notepad» we «Paint» programmalarynyň täze synag wersiýalaryny hödürledi. The Verge neşiriniň ýazmagyna görä, bu täzelikler häzirki wagtda «Windows Insider» maksatnamasyna gatnaşyjylar üçin elýeterlidir.
Paint programmasynyň täze (11.2512.191.0) wersiýasynda «Coloring book» diýlip atlandyrylýan täze gural peýda boldy. Ol ýönekeý ýazmaça beýan etme esasynda reňklemek üçin niýetlenen suratlary döretmäge mümkinçilik berýär.
Bu nähili işleýär?
- Paint programmasyndaky Copilot menýusyndan «Coloring book» bölümini saýlamaly.
- Isleýän suratyňy ýazmaly (mysal üçin: «ponçigiň üstünde oturan enaýyja tüýli pişik»).
- Emeli aň awtomatiki usulda suratyň dört sany nusgasyny döreder.
- Saýlap alan nusgaňyzy iş meýdançasyna goşup, ony reňkläp bilersiňiz. Şeýle-de, programmada reňk guýmagy (zaliwka) has takyk dolandyrmak üçin ýörite süýşürgiç (polzunok) goşuldy.
«Notepad» (11.2512.10.0) programmasynda hem birnäçe möhüm özgerişlikler bar. Indi programma üsti çyzylan tekstleri we iç-içine ýerleşdirilen sanawlary tanap bilýär. Emeli aň arkaly tekst döredilende, ulanyjy jogabyň doly taýýar bolmagyna garaşman, tekstiň ýazylyşyny hakyky wagtda görüp biler.
