Robot el dyrmaşyp we elýeterden uzakdaky zatlary gapjap alyp bilýär

Lozannanyň Federal politehniki mekdebiniň (EPFL) alymlary özbaşdak hereket edýän we zatlary gapjap tutup bilýän robot eli döretdiler.
Biraz möýi ýatladýan robot esasy manipulýator golundan «gopup», elýeterden uzakdaky ýerlere ýetip, zerur zatlary «ele salyp», yzyna gaýdyp bilýär. Robotyň bu başarnygy oňa dar ýerlerde adamlardan has netijeli işlemäge mümkinçilik berýändigine ünsi çekýärler.
Robot penjesiniň dizaýny adam eliniň anatomiki çäklendirmelerini ýeňip geçýär. Diňe başam barmagy bilen ygtybarly tutmaga mümkinçiligi bolan adam elinden tapawutlykda, täze manipulýator zady islendik iki "barmagynyň" arasynda berk saklap bilýär. Barmaklar zady eliň iç ýüzünde-de, daş ýüzünde-de deň güýç bilen gysymlap saklaýar, bu bolsa adam eliniň edip bilmejek zady.
Bu ýagdaý robota bir wagtyň özünde hem-ä haýsydyr bir guraly, hemem onuň üsti bilen bejerýän zadyny saklamaga mümkinçilik berýär. Beýle başarnyk, esasanam, dar giňişde işlenilýän wagtynda ýa-da iki eliňi hem ulanmak zerur bolanda örän möhümdir. 
Täze penje enjamlary abatlaýyş, çylşyrymly infrastrukturany we tehnikany barlaýyş işlerinde uly peýda getirip biler.