Milanda Erkekler modasynyň hepdeligi öz işine başlady. Bu möwsümde moda hepdeliginiň maksatnamasynda 76 sany çäre meýilleşdirildi. Instagram-daky Lyst neşiriniň habar bermegine görä, hepdeligiň başynda iň täsirli pursatlaryň biri — «Dolce & Gabbana» brendiniň garaşylmadyk konsepsiýaly görkezilişi boldy.
Dizaýnerler bu gezekki görkezilişde sahna bilen tomaşaçylaryň oturýan ýeriniň arasyndaky araçägi wizual taýdan aýyrdylar. Brendiň täsin oýlap tapan usulyna görä, modeller adaty myhmanlaryň arasynda oturdylar we garaşylmadyk pursatda ýerlerinden galyp, podiuma çykyp başladylar.
Bu geň galdyryjy usul sosial ulgamlarda uly gyzyklanma döretdi. Tomaşaçylar öz teswirlerinde: «Eger ýanymda oturan adam birden ýerinden galyp sahna ýöräp gitse, biraz gorkardym, ýöne munda üýtgeşik bir zat bar», «Örän täzeçe görünýär», «Ajaýyp pikir» ýaly sözleri ýazýarlar.
Domeniko Dolçe we Stefano Gabbana täze erkekler kolleksiýasynda mertligiň dürli keşplerine — «ortaýer deňziniň bezemeni» we «intellektual işewürden» başlap, «kaşaň türgene» we hatda «gangstere» çenli ýüzlendiler. Kolleksiýanyň esasynda anyk kesilen we tikilen biçüwler, dürli detallaryň utgaşmasy hem-de sütükli derileriň ulanylmagy ýatyr.
