Valentino-nyň esaslandyryjysynyň 2 milliard dollarlyk mirasy kime galar?

Italiýanyň «Il Messaggero» gazeti dünýä belli Valentino brendiniň esaslandyryjysy, meşhur modelýer Walentino Garawaniniň mirasy baradaky maglumatlary açyklady. 19-njy ýanwarda 93 ýaşynda aradan çykan dizaýneriň umumy baýlygy takmynan 2 milliard dollar möçberinde çaklanylýar.

Dizaýneriň galdyran ägirt uly baýlygyna gymmat bahaly gozgalmaýan emläkler, hususy sungat eserleriniň kolleksiýasy, iki sany iri kompaniýa degişlidir.
Garawaniniň aýaly we çagalary bolmansoň, onuň baýlygynyň paýlanyşy Rimiň notariusynda saklanýan wesýetnama esasynda kesgitlener. Esasy mirasdüşerleriň hatarynda onuň gyz dogany Wanda we ýegeni Oskar, köp ýyllyk işewür hyzmatdaşy Jankarlo Jammetti, uzak wagtlap bile işleşen işdeşi Brýus Huksema, modelýeriň ýanynda ulalan doganlar — Şon we Entoni Sakslar bar.
Şeýle-de bolsa, Italiýanyň kanunçylygyna laýyklykda, mirasyň käbir bölegi ýakyn garyndaşlar (mysal üçin, uly aýal dogany we çowlugy) üçin hökmany paý hökmünde bölünip berlip bilner.
Walentino Garawani 1932-nji ýylda Italiýada doguldy. Ol 1960-njy ýyllaryň başynda Jankarlo Jammetti bilen bilelikde Valentino moda öýüni esaslandyryp, ony dünýäniň iň kaşaň brendleriniň birine öwürdi. Bellemeli zat, 2012-nji ýyldan bäri brend Kataryň «Mayhoola» maýa goýum toparyna degişlidir.