24 ýurtdan 400-e golaý millioner dünýä liderlerine milliarderleriň salgytlaryny ýokarlandyrmak haýyşy bilen ýüzlendiler. «Ýeňmegiň wagty» atly açyk hat Dawosdaky Bütindünýä ykdysady gorumyna gatnaşyjylara niýetlenildi.
Açyk hata gol çekenleriň arasynda aktýor we režissýor Mark Ruffalo, sazanda Braýan Eno we kino prodýuseri we haýyr-sahawatçy Abigeýl Disneý bar. Hatyň awtorlary dünýä ilatynyň 1% -iniň umumylykda adamlaryň 95% -inden has köp baýlyga eýedigini belläp, bu tapawudyň artmagyny dowam etdirýändigini ýanjaýarlar.
Hatyň mazmunynda şeýle baýlygyň aşa köp jemlenmeginiň demokratiýalary gowşadýandygy, garyplygy, sosial çetleşdirilişi artdyrýandygy we ekologiýa meselelerini has-da güýçlendirýändigi aýdylýar. Gol çekenler jemgyýetiň «kertiň gyrasynda howply deňagramlylygy» saklajak bolşuny görmekden ýadandyklaryny aýdýarlar we syýasatçylary söze bile baglaman, anyk hereketlere geçmäge çagyrýarlar.
Açyk hatda «Biz muny ähli adamlar bilen egin-egne durýan millionerler hökmünde talap edýäris. Saýlanan wekillerimiz bolan siz – ýerli geňeş agzalary, şäher häkimleri we sebitleýin ýolbaşçylar, hatda Dawosda bolsaňyzam, bulary ýerine ýetirmäge borçlusyňyz. Şonuň üçin bize-de, tüçjar baýlara-da salgyt salyň» diýlip, degişli wekillere talap bilen ýüzlenilýär.
Oxfam haýyr-sahawat guramasynyň maglumatlaryna görä, milliarderleriň umumy baýlygy 2025-nji ýylda 16% artyp, 18,3 trillion dollara ýeter. Dünýäniň iň baý adamlarynyň 2025-nji ýylda ösüş depgininiň geçen ýyl bilen deňeşdirilende üç esse ýokary bolandygy hem öň habar berlipdi.
