Vogue fransuz žurnaly 2026-njy ýylda regencycore stiliniň meşhurlygynyň artjakdygyny çaklady. Gürrüň XIX asyryň modasyndan, ilkinji nobatda, Beýik Britaniýada regentlik döwründen ylham alan egin-eşikler barada gidýär.
Neşiriň redaksiýasy bu estetika bolan gyzyklanmany «Brijertonlar» serialynyň gaýdyp gelmegi bilen baglanyşdyrýar. Dördünji möwsümiň birinji bölegi 29-njy ýanwarda, ikinjisi 26-njy fewralda Netflix-de çykar. Žurnalyň maglumatlaryna görä, bu teletaslama eýýäm gözleg ulgamlarynda XIX asyryň birinji ýarymynyň geýimleri bilen baglanyşykly soraglary güýçlendirýär.
Şeýle-de, regencycore stiliniň ýaýramagyna TikTok-daky kontentler we ýazyjy Jeýn Ostiniň döredijiligine bolan gyzyklanmanyň artmagy hem ýardam edýär. Onuň romanlarynyň we «Brijertonlaryň» gahrymanlary dörtburç ýakaly, gaba ýeňli, uzyn ellikli ampir siluetindäki eşikleri geýýär hem-de mahmaldan aksessuarlary, dür we ýelek dakynýar. Bu obrazlar romantizm we näziklik bilen tapawutlanyp, eýýäm häzirkizaman dizaýnerlere täsirini ýetirdi.
2026-njy ýylyň ýaz-tomus möwsüminde regentlik döwrüniň estetika elementleri Louis Vuitton, Dior we Saint Laurent brendleriniň kolleksiýalarynda peýda boldy. Acne Studios ýubka we uzyn ellik bilen kružewo korsetini hödürledi, tirsekden ýokary ellikleri bolsa Prada we Balenciaga hem görkezdi.
Vogue-nyň çaklamasy boýunça, gündelik modada XIX asyra bolan gyzyklanma bilinden giňeýän köýnekleriň, jins bilen korsetleriň, dörtburç ýakaly üstki geýimleriň, Meri Jeýn köwüşleriniň we ş.m. meşhurlygynda görnüp bilner.
