Turiniň kazyýeti «Ýuwentus» klubunyň arbitraž kazyýetiň Kriştianu Ronalduwa 9,7 mln ýewro tölemek baradaky kararyna garşy arzasyny ret etdi. Bu barada La Gazzetta dello Sport neşiri habar berdi.
2024-nji ýylda arbitraž «Ýuwentusy» futbolça 9,7 mln ýewro tölemäge borçlandyrypdy. Oýunçy şeýle mukdary Angliýanyň «Mançester Ýunaýtedine» geçenden soň şertnamanyň ýatyrylandygy üçin pul hökmünde almalydy. Koronawirus pandemiýasy döwründe klub oýunçy bilen 19,6 mln ýewro möçberde zähmet hakynyň möhletini yza süýşürmek barada ylalaşdy. Taraplar 2021-nji ýylyň 31-nji iýulyna çenli bu pullaryň bonus hökmünde tölenjekdigi barada şertnama baglaşdy, ýöne töleg geçirilmedi. Şondan soň Ronaldu kazyýete ýüz tutdy.
2022-nji ýylyň 29-njy noýabrynda «Ýuwentusyň» müdirler geňeşiniň köp agzalary işden çykdy, olaryň arasynda prezident Andrea Anýelli we wise-prezident Pawel Nedwed hem bar. Soňra Turiniň prokuraturasy maliýe düzgün bozmalarynda güman etmek bilen klubuň öňki ýolbaşçylaryna gatnaşykda derňew işine başlady.
Ronaldu «Ýuwentusda» 2018-nji ýyldan 2021-nji ýyl aralygynda oýnady. Bu döwürde 134 oýna gatnaşyp, 101 gol geçirdi we 28 assist etdi. Klub bilen bilelikde iki gezek Italiýanyň çempionatyny (2018/19, 2019/20) utdy, iki gezek ýurduň Superkubogyny we bir gezek Kubogyny gazandy.
