Dubaý dünýäde iň uly bitewi wirtual yşarat dili sapagyny geçirmek arkaly Ginnesiň täze dünýä rekordyny goýmagy meýilleşdirýär. Bu giň gerimli çäre 2026-njy ýylyň 21-nji ýanwaryna meýilleşdirilýär. Onuň howandary hökmünde Dubaý Jemgyýetçilik Ösüş Agentligi (CDA) çykyş edýär.
Onlaýn sapak 2025-nji ýylyň oktýabr aýynda Maýyp adamlaryň hukuklary boýunça Ýokary Komitetiň başlygy Şeýh Mansur bin Mohammed Al Maktum tarapyndan başlanan «Dubaý yşarat dilinde aragatnaşyk saklaýar» başlangyjynyň bir bölegi bolar. CDA taslamanyň eşidiş bozulmalaryndan ejir çekýän adamlara jemgyýet taýdan goşulyşmagy we goldaw bermegi, şeýle hem şäher gurşawynda sanly we akylly hyzmatlaryň ulanylyşyny giňeltmegi maksat edinýändigini belleýär.
CDA-nyň baş direktory Hessa bint Essa Buhumaid bu sapagyň BAE-niň inklýuziw jemgyýeti gurmakdaky çemeleşmesini görkezýändigini we maýyp adamlary jemgyýete we ykdysady durmuşa işjeň gatnaşmaga höweslendirýändigini hem aýtdy.
Şonuň bilen birlikde bu taslama döwlet we hususy edaralardaky hyzmatlara elýeterliligi gowulandyrmagy maksat edinýär. Onlaýn yşarat dili sapagyna guramalar, bilim edaralary, jemgyýetçilik köpçüligi, şeýle-de dünýäniň dürli künjeginden adamlar gatnaşyp bilerler.
Hasaba goşulmak üçin görkezmeler https://dcsl.cda.gov.ae web sahypasynda ýerleşdirilen.
