Janköýerler 2026-njy ýylyň dünýä çempionatyna petek satyn almak üçin Random Selection Draw tapgyrynyň çäklerinde 500 milliondan gowrak arza tabşyrdy. Arzalary kabul ediş möhleti 2025-nji ýylyň 11-nji dekabryndan 2026-njy ýylyň 13-nji ýanwaryna çenli dowam etdi. FIFA bu islegiň dünýä sportynyň taryhynda rekorddygyny belledi.
Guramanyň maglumatlaryna görä, her gün guramanyň 211 agza döwletiniň ählisinden, takmynan, 15 million arza gelip gowuşdy. Iň ýokary işjeňligi ABŞ-nyň, Meksikanyň, Kanadanyň, Germaniýanyň, Angliýanyň, Braziliýanyň, Ispaniýanyň, Portugaliýanyň, Argentinanyň we Kolumbiýanyň ýaşaýjylary görkezdi.
Häzirki tapgyrda iň köp isleg bildirilen oýun Maýamide geçiriljek Kolumbiýa bilen Portugaliýanyň milli ýygyndylarynyň arasyndaky oýun boldy. Ýokary gyzyklanmany Meksika bilen GAR-yň arasyndaky açylyş oýny (Mehikoda geçiriler), Meksika – Günorta Koreýa oýny (Gwadalahara), Torontodaky 1/16 final oýny we Nýu-Jersidäki final hem görkezdi.
«Bir aýdan gowrak wagtyň içinde petekler üçin ýarym milliard arza – bu köp zady aňladýar. Men FIFA-nyň adyndan dünýädäki ähli futbol janköýerlerine şeýle uly isleg üçin minnetdarlyk bildirmek we gutlamak isleýärin» – diýip, FIFA-nyň prezidenti Janni Infantino aýtdy.
Guramanyň ýolbaşçysy stadionlaryň sygymynyň çäklidigi sebäpli FIFA-nyň janköýerler üçin goşmaça oflaýn we onlaýn çäreleri taýýarlaýandygyny belledi.
«Biz stadionlarda her bir janköýeri kabul edip bilmeýändigimize gynanýarys» – diýip, Infantino sözüniň üstüne goşdy.
