2025-nji ýylda dünýäde her bäşinji ýaş adam ne okuw, ne-de iş bilen meşgullandy. Şeýle maglumatlar Halkara zähmet guramasynyň (HZG) häzirki ýyl üçin hasabatynda saklanýar.
Hasabata görä, bilim, iş ýa-da hünär taýýarlygy bilen meşgullanmaýan ýaşlaryň paýy 20%-e ýetdi. HZG-niň bilermenleriniň hasaplamalary boýunça, bu 257 million adamyň geljekki karýeralary üçin möhüm bolan bilim we tejribe almak mümkinçiliginden mahrum bolandygyny aňladýar.
Bu görkeziji 2023-nji ýyldan bäri ýokarlanýar we guramanyň çaklamasy boýunça, 2027-nji ýyla çenli ortaça ýokarlanmagyny dowam etdirer. Girdejisi ýokary bolan ýurtlarda işsiz we okuwsyz ýaşlaryň paýy 10,9%-e, pes girdejili döwletlerde 27,9%-e deň.
HZG-niň çaklamalaryna görä, 2026-njy ýylyň jemi boýunça dünýäde işsizligiň ortaça derejesi 2025-nji ýyldaky derejesinde galar we 4,9% bolar, işsiz adamlaryň sany bolsa 186 milliona ýeter.
Baý ýurtlarda iş orunlarynyň sany 0,5%, garyp ýurtlarda 3,1% artar. Bu işe ukyply ýaşdaky adamlaryň sany azalýan barly ýurtlarda ilatyň garramagy bilen baglanyşyklydyr. Ýewropada işsizlik 5,5% derejesinde saklanar, ABŞ-da we Kanadada bolsa onuň orta möhletli geljekde ýokarlanmagyna garaşylýar.
Şol bir wagtyň özünde, işiň bolmagy mynasyp girdejini kepillendirmeýär: 300 million töweregi adam günde 3 dollardan az gazanýar. Afrikanyň we Latyn Amerikasynyň köp ýurtlarynda ilatyň ýarysyndan gowragy resmi däl işlerde zähmet çekýär.
