Birleşen Ştatlar 14-nji ýanwardan başlap ýarymgeçirijileriň importyna 25% möçberde gümrük pajyny girizdi. Bu barada Ak tamyň metbugat gullugy Prezident Donald Trampyň yglan eden jarnamasynyň tekstini neşir etmek bilen habar berdi.
Gürrüň «ösen» mikroshemalar we şuňa meňzeş önümler barada gidýär. Şol bir wagtyň özünde, kadadan çykmalar göz öňünde tutulýar: eger çipler ABŞ-da önümçiligi, maglumat merkezleriniň işini giňeltmek, startaplara goldaw bermek ýa-da ylmy gözlegleri geçirmek we işläp taýýarlamalar üçin getirilýän bolsa, gümrük pajy alynmaz.
Prezident häzirki wagtda ABŞ-nyň zerur bolan ýarymgeçirijileriň diňe, takmynan, 10%-ini öndürýändigini, şonuň üçin ýurduň ykdysadyýetiniň daşary ýurt üpjün edijilerine ýokary derejede garaşlydygyny belledi. Onuň aýtmagyna görä, bu milli howpsuzlyk üçin töwekgelçilik döredýär.
Resminamada söwda ministri Goward Lýutnigiň iki tapgyrlaýyn meýilnamany durmuşa geçirip başlamagy maslahat berendigi bellenilýär. Ol ABŞ-nyň çäginde ýarymgeçirijileriň önümçiligine maýa goýjak daşary ýurt kompaniýalaryna goldaw bermegi göz öňünde tutýar. Bu bolsa kem-kemden ýurduň importa garaşlylygyny azaldar.
