Türkmenistanyň «Kämil» awtosport klubunyň türgenleri Hytaýyň Çunsin şäheriniň Sýanszin etrabynyň Hab-Port senagat sebitinde dekabr aýynda geçirilen motokross boýunça Hytaýyň çempionatynyň (CMX) halkara tapgyryna gatnaşdylar. Bu barada «Neýtralnyý Türkmenistan» gazeti habar berýär.
Göwrümi 250 kub santimetre deň bolan benzinli motosikllerde geçirilen ýaryşlarda Serdar Mollamyradow we Begenç Annaýew çykyş etdiler. Olar motosikl tehnikasyny öndürýän dünýäniň iri kompaniýalary bolan «QJMotor», «CFMoto» we «KAYO» ýaly toparlaryň wekilleri bilen bäsleşdiler.
Elektromotosikllerdäki ýaryşlarda bolsa Türkmenistana Konstantin Fedoryçew we Karen Awagýan wekilçilik etdiler. Ýaryşlar gaty örtükli we ýokary tizlikli bölümlerden ybarat bolan çylşyrymly ýolda geçirildi. Bu bolsa tehnikanyň we türgenleriň taýýarlyk derejesine ýokary talaplary goýýar.
Toparyň Hytaýdaky işine «Kämil» klubunyň direktory, «Dakar — 2015» we «Ýüpek ýoly» halkara ralli-reýdlerine gatnaşan tejribeli türgen, Türkmenistanyň sport ussady Şamyrat Gurbanow ýolbaşçylyk etdi.
Onuň berýän bahasyna görä, Çunsindäki çykyşlar türgenler üçin 2026-njy ýylyň ýaryşlaryna taýýarlyk görmegiň çäklerinde möhüm tejribe boldy. Topar geljekde goňşy döwletleriň açyk çempionatlaryna hem işjeň gatnaşmagy meýilleşdirýär.
