Detroýtda geçirilen Demirgazyk Amerikanyň halkara awtosalonynda «Demirgazyk Amerikada ýylyň awtomobili 2026» baýragynyň ýeňijileri yglan edildi. Şu ýyl baş baýraklary Dodge Charger, Ford Maverick Lobo we Hyundai Palisade aldy.
Dabara çarşenbe güni irden geçirildi, ýeňijiler ABŞ-dan we Kanadadan öňdebaryjy awtomobil žurnalistlerinden ybarat eminler topary tarapyndan saýlandy diýip, AP habar berýär.
Baş baýraklar şeýle görnüşde paýlandy:
Ýylyň awtomobili: Dodge Charger
Ýylyň ýük ulagy: Ford Maverick Lobo
Ýylyň utilitar awtomobili: Hyundai Palisade
Hünärmenler awtoulaglara ösen innowasiýalar, dizaýn, öndürijilik, howpsuzlyk we sürmekde rahatlyk ýaly görkezijiler boýunça baha berdi.
Ýeňil ulaglaryň kategoriýasynda Dodge Charger gibrid Honda Prelude kupesinden we ykjam Nissan Sentra-dan öňe geçdi. Ýük ulaglarynyň arasynda Ford Maverick Lobo ulagy Ram 1500 Hemi we Ram 2500 pikaplaryndan üstün geldi. Hyundai Palisade bolsa utilitar awtomobilleriň segmentinde Lucid Gravity we Nissan Leaf ýaly elektrik hereketlendirijili bäsdeşlerinden öňe geçdi.
Bu baýraklar Demirgazyk Amerikada iň abraýlylaryň biri hasaplanýar we hünärmenleriň baha bermeginde alyjylara täze modelleri saýlamaga kömek edýär.
