Ýewropa futbolynda gyşky transfer penjiresi eýýäm birnäçe gyzykly transferlere getirdi. Klublar möwsümiň ahyrky bölegine taýýarlanmak bilen, işjeň ýagdaýda öz düzümlerini güýçlendirýär.
«Barselona» öz resmi saýtynda gyraky goragçy Žoau Kanseluny möwsümiň ahyryna çenli kärendesine alandygy barada habar berdi.
31 ýaşly portugaliýaly oýunçy katalon kluby üçin 2023 – 2024-nji ýyllarda-da oýnapdy. Ol ähli ýaryşlarda 42 oýna gatnaşyp, dört gol geçirdi we bäş assist etdi. Transfermarkt portalynyň maglumatlaryna görä, onuň bazar bahasy 10 mln ýewro barabar.
Şwesiýaly Zlatan Ibragimowiçiň ogly, hüjümçi Maksimilian Ibragimowiç Niderlandlaryň «Aýaks» klubunyň oýunçysy boldy. 19 ýaşly hüjümçiniň kärende şertnamasy alty aýa niýetlenýär, ýöne şertnamada satyn almak mümkinçiligi-de göz öňünde tutuldy. Ozal Maksimilian «Hammarbýunyň» ýaşlar akademiýasynda, 2022-nji ýyldan başlap bolsa «Milanyň» akademiýasynda oýnady. Soňky ýarym ýylda ol Seriýa D-de klubuň ikinji topary «Milan Futuroda» çykyş etdi.
Ýatlap geçsek, Zlatanyň özi hem dürli ýyllarda «Aýaksda» we «Milanda» oýnapdy.
Londonyň «Tottenhem» kluby Madridiň «Atletikosynyň» ýarymgoragçysy Konor Gallaher bilen şertnama baglaşdy. Oýunçynyň şertnamasy 5,5 ýyllyk bolup, 2031-nji ýylyň tomsuna çenli hereket edýär. Transfer mukdary 35 mln funt sterling boldy.
Gallaher 2024-nji ýylyň tomsunda «Çelsiden» 42 mln funt sterlinge «Atletiko» toparyna geçdi. Ol 77 oýna gatnaşyp, ýedi gol geçirdi. Ozal ol «Çarlton», «Suonsi», «West Bromwiç», «Kristal Pelas» we «Çelsi» klublarynda çykyş edip, soňkusy bilen Ýewropa ligasyny utdy. Angliýanyň milli ýygyndysy üçin 22 oýna gatnaşyp, bir gol geçirdi.
Gyşky transfer penjiresi Ýewropanyň öňdebaryjy ligalarynda 1-nji ýanwarda açyldy we 3-nji fewrala çenli dowam eder. Häzirki wagtda iň uly gyşky transfer «Bornmutyň» wingeri Antuan Semenýonyň 75 mln ýewro (65 mln funt sterling) «Mançester Sitä» geçmegi boldy.
