Katar 2028-nji ýylyň ýanwarynda taryhda ilkinji gezek guraljak zenanlaryň arasyndaky Klublaýyn dünýä çempionatyny geçirmek ugrunda FIFA bilen gepleşikleri alyp barýar. Bu barada "The Guardian" neşiri habar berýär.
Neşiriň bellemegine görä, Kataryň 2009-njy ýylda döredilen zenanlar milli ýygyndysy on ýyldan gowrak wagt bäri resmi duşuşyklary geçirmeýär we FIFA-nyň reýting sanawynda eýe bolan orny ýokdur.
Žurnalistleriň maglumatyna görä, Kataryň dalaşgärligine birnäçe amatly şertler esasynda garalýar. Olaryň hatarynda 2022-nji ýyldaky dünýä çempionaty üçin gurlan döwrebap stadionlar, gyş paslyndaky amatly howa şertleri we FIFA-nyň ýolbaşçylygy bilen ýola goýlan berk gatnaşyklar bar. Ýene-de bir mümkin bolan dalaşgär hökmünde Saud Arabystany agzalýardy, emma 2028-nji ýylyň ýanwarynda bu ýurtda eýýäm Ispaniýanyň Superkubogyny geçirmek meýilleşdirilipdir.
Bu ýaryşyň her dört ýyldan bir gezek geçirilmegine garaşylýar. Çempionatyň ýanwar aýynda guralmagy halkara futbol senenamasyna goşmaça agram salyp biler. Bu bolsa, gyşky arakesmäniň uzaldylmagy sebäpli, esasan hem Ýewropanyň milli çempionatlarynyň tertibine üýtgetmeler girizilmegini talap eder.
Täze ýaryşyň formaty 16 klubuň gatnaşmagyny göz öňünde tutýar:
- Ýewropa: azyndan 5 klub;
- Aziýa, Afrika, Günorta Amerika we Demirgazyk Amerika: hersinden 2 topar;
- Saýlama tapgyr: ähli konfederasiýalaryň gatnaşmagyndaky ýaryş arkaly ýene-de 3 topar.
FIFA häzirlikçe ýer eýesi boljak ýurdy saýlamagyň resmi ölçeglerini we toparlaryň saýlanyş tertibini yglan etmedi.
