SpaceX amerikan kompaniýasynyň köp gezeklik Crew Dragon kosmos gämisi Crew 11 missiýasynyň ekipažy bilen şu gün Kaliforniýanyň günorta kenaryndaky Ýuwaş ummana üstünlikli gondy. Bu barada NASA habar berýär.
NASA-nyň astronawtlary Zena Kardman we Maýk Fink, «Roskosmosyň» kosmonawty Oleg Platonow we Ýapon kosmos agentliginiň astronawty Kimiýa Ýui Halkara kosmos stansiýasynda 165 gün bolandan soň Ýere gaýdyp geldi. Kapsulanyň paraşýut ulgamynyň kömegi bilen suwa gonmagy ABŞ-nyň Gündogar kenarynyň wagty bilen 03:41-de (Aşgabat wagty bilen 13:41) San-Diego sebitinde bolup geçdi.
Gonuş ýerine SpaceX-iň gözleg-halas ediş gämisi nobatçylyk etdi. Ol kapsulany gidrawliki enjam bilen borta galdyrdy. Ekipaž kenara eltmezden öň ilkinji lukmançylyk barlagyndan geçýär.
Crew 11 missiýasy ekipažyň agzalarynyň biriniň saglygynyň ýaramazlaşmagy sebäpli möhletinden ir tamamlandy. Nogsanlyk mikrograwitasiýa şertlerinde uzak wagtlap bolmakdan ýüze çykdy. NASA munuň gyssagly ewakuasiýa däl-de, dürli garaşylmadyk ýagdaýlar ýüze çykanda ekipažy yzyna gaýtarmak mümkinçiliginiň meýilleşdirilmedik synagydygyny aýdýar.
Crew Dragon ugrandan soň, HKS-de NASA-nyň astronawty Kristofer Uilýams hem-de 27-nji noýabrda «Soýuz MS-28» gämisinde orbita çykan «Roskosmosyň» kosmonawtlary Sergeý Kud-Swerçkow we Sergeý Mikaýew galdy.
