Tozan sorujylaryň we beýleki öý tehnikalarynyň öndürijisi hökmünde meşhur bolan Hytaýyň Dreame kompaniýasy, Las-Wegasda geçirilen CES 2026 sarp ediş elektronikasy sergisinde dört gapyly elektrikli Nebula Next 01 superkarynyň prototipini hödürledi.
CarNewsChina portalynyň habar bermegine görä, awtoulag kuzowynyň burulma garşy ýokary berkligi, uglerod plastiginiň (karbon) giňden ulanylmagy we örän çalt tizlenmegi bilen tapawutlanýar — ol 100 km/sag tizlige bary-ýogy 1,8 sekuntda ýetýär. Bu görkezijiler konsepti dünýäniň iň çalt seriýaly elektrokarlary bilen bäsleşmäge ukyply edýär.
Dreame-iň awtoulaglarynyň ilkinji dizaýn taslamalary (renderleri) Bugatti modellerini ýatladýan bolsa, Nebula Next 01-iň keşbi has çok Ferrari we Lotus-a meňzeşdir. Şeýle-de bolsa, dizaýnda göni göçürmeler ýok. Konseptiň üýtgeşik aýratynlygy — onuň superkarlar arasynda seýrek duş gelýän dört gapyly gurluşydyr. Häzirki wagtda awtoulag diňe prototip görnüşinde bolup, onuň doly bezelen salony (interýeri) entek ýok. Bu bolsa beýleki öndürijileriň meňzeş konsepsiýaly modelleri has ir bazara çykaryp biljekdigini aňladýar. Nebula Next 01-iň seriýaly önümçiligine 2027-nji ýyldan ir başlanmagyna garaşylmaýar.
Nebula-nyň tehniki aýratyznlyklary:
- Kuwwaty: 1903 at güýjüne deň bolan dört sany elektrik hereketlendirijisi.
- Sowadyş ulgamy: Her motor aýry-aýry termiki dolandyryş ulgamy bilen üpjün edilen.
- Super Boost režimi: Güýç gysga wagtlyk 30% artýar we iň ýokary tizlenmäni üpjün edýär.
- Kuzowyň berkligi: Burulma garşy berklik 45 000 Nm/grad düzýär (bu görkeziji Porsche Taycan-dan 3 000 Nm/grad ýokarydyr).
