Forbes neşiri ýylyň iň girdejili sport klublarynyň reýtingini hödürledi. Sanawda birinji orny Milli futbol ligasynda (NFL) çykyş edýän amerikan futbol topary «Dallas Kowboýz» eýeledi.
Klubuň geçen möwsümde operasion girdejisi 629 mln dollar boldy. Bu görkeziji göterimlerden, salgytlardan, zatlaryň könelme bahasynyň saklanyp galmagyndan we amortizasiýadan öňki girdejini görkezýär. Forbes «Dallas Kowboýzyň» bahasyny 13 mlrd dollar diýip hasaplaýar. Gyzykly ýeri, topar soňky gezek Superbouly 1995-nji ýylda utdy.
Reýtingde ikinji orny Milli basketbol assosiasiýasynyň (NBA) «Golden Steýt Uorriorz» kluby eýeledi. Onuň operasion girdejisi 409 mln dollar boldy, bu bolsa sanawyň öňdebaryjysyndan tas 200 mln dollar azdyr. Toparyň bahasy 11 mlrd dollar diýlip hasaplanýar.
Üçünji orny iki topar – Milli hokkeý ligasyndan (NHL) «Edmonton Oýlerz» we NFL-den «Los-Anjeles Rems» paýlaşdy. Her klubuň operasion girdejisi 244 mln dollar boldy. Ýöne olaryň bazar bahasy düýpli tapawutlanýar: «Oýlerz» 3,2 mlrd dollar, «Rems» bolsa 10,5 mlrd dollar bilen bahalandyrylýar.
Şeýle-de, reýtingiň ilkinji onlugyna 227 mln dollar operasion girdeji bilen «Formula-1-den» «Mersedes» topary, «Nýu-Inglend Petriots» (NFL) – 222 mln dollar, «Atlanta Hoks» (NBA) – 203 mln dollar, «Filadelfiýa Sewenti Siksers» (NBA) – 203 mln dollar, «Hýuston Rokets» (NBA) – 191 mln dollar we «Toronto Meýpl Lifs» (NHL) – 191 mln dollar girdi.
