Halkara Futbol Federasiýasy (FIFA) we Halkara Futbol Assosiasiýalarynyň Geňeşi (IFAB) eýýäm indiki möwsümden başlap, “Arsen Wengeriň ofsaýdyny” girizip bilerler. Bu barada "RMC Sport" neşiri habar berýär.
Gürrüň Londonyň "Arsenal" toparynyň öňki tälimçisi Arsen Wengeriň tekliplerine laýyklykda ofsaýd (oýundan daşardaky ýagdaý) düzgünine düýpli üýtgetmeler girizmek barada gidýär. 76 ýaşly fransuz hünärmeni 2019-njy ýyldan bäri FIFA-da Futboluň global ösüşi boýunça direktor wezipesini eýeleýär.
Wengeriň hödürleýän düzgünine görä, hüjümçi diňe tutuş göwresi bilen goragçydan öňe geçen halatynda ofsaýd hasaplanar. Häzirki düzgün boýunça hüjümçiniň gol geçirip biljek islendik beden agzasynyň goragçydan sähelçe öňe geçmegi ofsaýd üçin ýeterlikdir.
Çeşmäniň berýän maglumatyna görä, IFAB bu üýtgetmäni 20-nji ýanwarda Londonda geçiriljek ýyllyk maslahatynda seljerer. Teklip fewral aýynda Baş Assambleýa hödürlener we makullanan ýagdaýynda, 2026/2027-nji ýyllaryň möwsüminde durmuşa geçiriler.
Mundan başga-da, Geňeşiň gün tertibinde ýene bir synag düzgünine seretmek göz öňünde tutulýar: meýdançada lukmançylyk kömegini alan futbolçy (derwezebandan başgasy) oýundan iki minutlyk çetleşdiriler. Bu çäre wagt ýitirilmeginiň we oýunçylaryň emeli "şikesleriniň" öňüni almak üçin niýetlenendir.
Geçen ýylyň dekabrynda geçirilen Arap Milletler Kubogynda bu iki düzgüniň hem oňyn netijeler berendigi bellenilýär.
IFAB tarapyndan seljeriljek ýene bir möhüm ugur — VAR (wideo-kömekçi emin) ulgamynyň kämilleşdirilmegidir. FIFA-nyň eminler komitetiniň başlygy Pýerluiji Kollina indiki Dünýä çempionatynda girizilip bilinjek üýtgeşmeler, şol sanda ikinji sary kart we burç urgulary ýaly ýagdaýlarda wideo-gözden geçiriş ulgamyny ulanmagyň mümkinçilikleri barada aýtdy.
