Ganyň düzümindäki S-reaktiw belogynyň (SRB) derejesi infarktyň we insultuň ýüze çykmagyny adaty holesterin görkezijilerinden has takyk çaklamaga mümkinçilik berýär. Bu belogyň görkezýän dowamly çişme ýagdaýy aterosklerozyň ähli tapgyrlarynda esasy orun eýeleýär. Bu barada Makon lukmançylyk merkeziniň (ABŞ) maşgala we jemgyýetçilik lukmançylygy kafedrasynyň dosenti Meri J. Skurbutakos «The Conversation» neşirine habar berdi.
Soňky ýigrimi ýylyň ylmy maglumatlaryna görä, SRB çaklama takyklygy boýunça pes dykyzlykly lipoproteinlerden (setin holesterinden) has öňe geçýär. Bu belok bagyr tarapyndan ýokanç kesellere, dokumalaryň zeperlenmegine, semizlige we süýji keseline garşy reaksiýa hökmünde işlenip çykarylýar.
«SRB-ni adaty gan seljermesi arkaly aňsatlyk bilen ölçäp bolýar. Onuň pes derejesi — 1 mg/dl-den az bolmagy — minimal çişme we ýürek-damar keselleriniň pes töwekgelçiligini aňladýar. 3 mg/dl-den ýokary görkezijiler bolsa infarkt we insult ähtimallygynyň ep-esli ýokarydygy bilen baglanyşyklydyr. Hasaplamalara görä, ABŞ-nyň uly ýaşly ilatynyň takmynan ýarysynda S-reaktiw belogynyň derejesi ýokarydyr» diýip, Skurbutakos belledi.
Patologik proses damar diwarlarynyň zeperlenmegini, merjenleriň (blýaşkalaryň) ösmegini we ýarylmagyny, şonuň netijesinde bolsa trombly dykylmalaryň emele gelmegini öz içine alýar. Bu görkezijiniň derejesini peseltmek üçin fiziki işjeňlik, agramyňy gözegçilikde saklamak hem-de düzüminde noýba, gök önümler, hoz we zeýtun ýagy bolan iýmitleri kabul etmek maslahat berilýär.
